ភ្នំពេញ៖ លោកវរសេនីយ៍ត្រី សួន តុសិត្យពិទូរ្យ ត្រូវបានក្រសួងមហាផ្ទៃ ដកហូតមុខតំណែងឋានន្តរស័ក្ដិ និងបណ្ដេញចេញពីក្របខ័ណ្ឌមន្ត្រីនគរបាលជាតិ។ នេះបើតាមសេចក្តីប្រកាសចុះនៅថ្ងៃទី១៩ ខែធ្នូ ឆ្នាំ២០២៣។

លោកវរសេនីយ៍ត្រី សួន តុសិត្យពិទូរ្យ ជានាយរងការិយាល័យរដ្ឋបាល-សរុប នៃមន្ទីរប្រឆាំងបទល្មើសគ្រឿងញៀន ចំណុះអគ្គស្នងការដ្ឋាននគរបាលជាតិ។ បើតាមអ្នកនាំពាក្យរងក្រសួងមហាផ្ទៃ លោក ទូច សុឃៈ មន្ត្រីរូបនេះត្រូវបានបណ្តេញចេញពីក្របខណ្ឌដោយសារតែក្រសួងរកឃើញជាប់ពាក់ព័ន្ធការប្រើប្រាស់ហិង្សា រក្សាទុក និងប្រើប្រាស់គ្រឿងញៀនខុសច្បាប់ ប្រព្រឹត្តកាលពីខែកញ្ញា ឆ្នាំ២០១៩។

លោក ទូច សុឃៈ បានលើកឡើងថា នេះមិនមែនជាលើកទីមួយទេដែលរដ្ឋមន្ត្រីក្រសួងមហាផ្ទៃថ្មីសម្រេចបណ្តេញមន្ត្រីដែលប្រព្រឹត្តល្មើសវិនិយ ចេញក្របខ័ណ្ឌមន្ត្រីនគរបាលជាតិ កន្លងមកក្នុងនីតិកាលកន្លងទៅ អតីតរដ្ឋមន្រ្តីក្រសួងមហាផ្ទៃ សម្ដេចក្រឡាហោម ស ខេង ក៏បានអនុវត្តវិធានការនេះយ៉ាងសកម្ម និងតឹងរឹងផងដែរ។

រដ្ឋមន្ត្រីក្រសួងមហាផ្ទៃ អភិសន្តិបណ្ឌិត ស សុខា បានបញ្ជាក់ឱ្យដឹងថា រាល់មន្ត្រីនគរបាលជាតិណាដែលជាប់ពាក់ព័ន្ធនឹងគ្រឿងញៀន គឺត្រូវបណ្តេញចេញពីក្របខណ្ឌដោយគ្មានការលើកលែងឡើយ៕